山系。本舍

Open Now

Now Closed

「文青」、「打卡」已經成為咗深水埗最新特色，而且亦不只局限於Cafe，今日就試吓呢間山系。本舍手作。小店位於界限街，入面裝修佈局充滿日系風情，而且仲用上一系列木製餐具，仲印上自家店舖名字，雖然店舖細細，但都睇得出店主為小店花咗唔少心思。餐牌選擇應有盡有，菜式亦甚有特色同風格。店內同時亦供應一系列來自日本嘅飲品。而我就選擇咗佢哋自家製嘅冷泡綠茶。所有飯、烏冬都會包埋兩款是日前菜，今日其中一款就係我最鍾意嘅涼拌茄子。茄子調味適中，而且仲有好香嘅麻油味，口感又香又滑。另一款前菜係麻醬沙律，新鮮沙律菜配上簡單嘅芝麻醬就已經令人胃口大開。主食方面，我哋就俾吾卵「系」叉燒飯呢個名字吸引咗，其實正確應該係滑蛋叉燒飯至真。日式叉燒選用五花腩製作，每件都厚薄適中燒得夠甘香，配合埋非常滑嘅炒蛋同蔥花真係冇得輸。另外我哋仲揀咗手工櫻花蝦醬拌手打烏冬，店員一送上餐盤喺我面前已經聞到非常撲鼻嘅櫻花蝦香味，原來櫻花蝦醬係佢哋自家製，自己新鮮炒所以特別香。烏冬夠彈牙，配合唔同種類嘅菇菌，口感特別豐富。深水埗而家嘅打卡餐廳開到成行成市，競爭相當大，呢間山系定價相宜味道佳，性價比高，可以喺市場內先勝一仗。