君煮 (Closed)

是咁的，公司樓下開左間新私房菜，於是決定同啲同事去食下，入面有幾個餸好食到不得了，無辦法唔推介一下。廢話少說，第一個招牌冰鎮鮑魚，實物比佢門口廣告嘅圖片更大，鮑魚入味有口感，仲洗到勁乾淨，啲女同事影左足足10分鐘先肯食，睇都已經值回票價。第二個雪蓮菇螺頭片燉豬𦟌，一睇落以為係家常小品，點知個湯清甜到無朋友。一飲就知無味精，連鹽都無乜點落，但係絕對夠味。第三個就係蟹肉炒魚肚，佢呢個菜係比大家好似泰式生菜包咁，用生菜包住食，再落少少乳豬醬，非常之有層次感。這裡不得不提，佢地啲生菜全部都剪成圓形，方便到不得了。整個菜都炒非常乾爽，蛋絲爽而不老，一顯大廚深厚炒功。整體黎講，啲食物基本上都係五星級酒店水準。家庭飯局，小型聚會呢度都會係好選擇。美中不足就係佢只有鑵裝啤酒提供，飲其他酒就要自己帶去喇。