裕記大飯店

Open Now

Now Closed

深井裕記燒鵝，廣告就聽得多，今次都係第一次食。首先嗌咗半隻炭燒燒鵝，上到黎好大份，可以想像到佢成隻鵝有幾大隻。燒鵝嘅皮夠脆，仲有一層皮下脂肪，但係鵝肉就冇想像中咁香，甚至有少少un，可能因為係厚切啦。另外我地嗌咗個酒釀鵝肝，一共有五大舊。個人覺得幾好食，但係就略嫌唔係好入味，得外面果層有酒味。相反豉油王灼鵝雙腸份量夠多又入味，條條腸都好肥，如果中意嘅話就推薦大家試下，如果唔係好接受到太肥嘅嘢就唔建議嗌啦。我地仲嗌咗炸蝦丸同椒鹽豆腐，兩樣小菜都不過不失，冇乜特別。總括黎講，可能係我期望太高，所以覺得啲嘢食冇想像中咁好食。下次再試下其他出名嘅菜式，或者會好好食呢。