花椒子 (Closed)

朋友搵到一間係旺角區，有得打邊爐，又有得聽歌，仲可以點歌嘅餐廳，仲有間房可以一邊打邊爐一邊唱k，真係啱晒一大班人聚會🤩而且玩味十足，以太空人做主題，打卡一流。佢除咗有放題打邊爐，仲可以散叫。我哋見散叫可以食到烤魚，而且不限時，所以諗咗好耐，決定放棄好抵食嘅放題，叫咗條烤魚食。佢有幾款味道，因為其中一個人怕辣，所以我哋叫咗蕃茄湯底，湯底勁濃，好正😍魚嘅份量都好驚人，條魚食極都仲有，魚嘅質地夠實，亦都夠入味，如果人少嘅話基本上唔需要點太多其他嘢食，下面仲有大量嘅蔬菜類食物，萵筍、芽菜、蓮藕等等。。。全部都好入味。我哋另外叫咗滑雞件、團團丸丸(即係丸類拼盤)、蔬菜拼盤、燕餃。滑雞件份量好足，好抵食。當中最推薦呢份丸拼盤，有四款，全部自家製，最特別係梅菜豬肉丸，食落有啲似蒸肉餅。餐廳氣氛好好，最大嘅好處係可以點歌，聽到自己想聽嘅歌，而且無論男女，把聲都好好聽，全晚都好enjoy😌