和平餐室 (禾輋廣場)

Open Now

Now Closed

今日去咗禾輋邨商場幫啲細路買校服，順便梗係去嗰度搵食啦，嗰度出名食肆多，都真係花都眼亂，見到有一間門口比較大，裝修幾特別，掛咗好多砧板係個牆壁上，仲有舊式街市檔的燈飾，望下個餐牌，原來食物以茶餐廳為主，我同兩個師奶，就入咗去試吓啦！一踏入門口，就有個着住制服嘅姐姐問我地幾位，個阿姐見到我哋有個細路，就安排左一個卡位俾我哋，四個人坐都幾鬆動！我哋睇下個餐牌，發現都有好多種類，先叫咗一個廚師煮意的「粒粒黑白浸時菜」，原來即係金銀蛋時菜，個服務員就問我地要咩菜，佢就推介左今日最新鮮嘅白菜俾我哋，出嚟個賣相唔錯，三色蛋切成粒粒，好啱送飯，菜湯又清甜，比起炒菜冇咁油膩，好啱夏天食！今次我最想推介係呢一個XO醬蝦米肉鬆炒粉絲，炒粉絲唔係周圍都有得食，粉絲上枱時，已經聞到陣陣的XO醬香味，睇落去就色香味俱全，粉絲食落去仲有黏口嘅感覺，味道比起炒面更出，值得一試，但粉絲太索油，如果一個人食，可能就比較飽肚！我哋仲叫左碟叉燒油雞，燒味味道唔錯，我地就估係自家製，埋單時，我就問帶位個阿姐，佢話廚房係有燒爐，燒味每天新鮮製造！如果第日去開果頭，都會考慮下買啲叉燒返屋企做餸！