鴻星中菜 (羅氏商業廣場) (Closed)

咁多間鴻星，我相信只得呢間係星期日中午唔駛等位，12點半去到仲有好多”吉”。雖然位於工廠區，但坐得好舒服，冇灣仔、中環同尖沙咀地方咁迫，當然大家d點心都一樣啦。過了特價時段，冇叫到炒粉麵飯，因為如果係正價就好唔抵!只係叫了點心。一定叫我最鍾意的壽包，蓮蓉不太甜，中間的蛋王係流油的，係我食咁多間酒樓之中最好食的，而且唔貴8蚊一個，大大個，我細妹話好食過東海，可借只叫了三隻，佢仲同我爭食tim；奶皇流沙包，奶皇味好香，細細個唔算太”溜”；蛋煎糯米雞其他地方好少食到，煎得好香口，我一個人食了半份；o黎到鴻星當然要食石頭魚喇，不過我係食石頭魚餃，好清好食過佢的蝦餃；老豆鍾意佢的菜乾豬骨粥，話好夠味(我懷疑落了味精)好足料，同埋蘿白牛什，鍾意佢炆得入味又夠淋(我同佢講車品品仲正呀!)；媽媽就鍾意豉油皇煎腸粉，佢話唔會好油喎!我姑姐就鍾意郊外油菜，話好靚好嫩又甜，姑丈不停食晒兩兜魚仔乾花生。每人都有鍾意食的野，所以食得好開心，6個人埋單到係三百幾蚊。