吉列牛忌廉烏冬專門店 (彌敦道)

Open Now

Now Closed

喺大阪吃過又平又好味嘅吉列牛，一直念念不忘牠的好。發現旺角都有吉列牛專門店，就約埋個同鄉去吃牛止渴，一解鄉愁。我哋嘅目標非常明確－－吉列牛同忌廉咖哩烏冬。餐牌上有個套餐係「吉列牛($148)+忌廉咖哩烏冬($78)+汽水兩罐= $246」，其實即係要加$20買兩罐汽水，唔划算，所以我哋都係散叫。吉列牛定食 $148上菜都幾快，我個心沉得仲快。吉列皮係濕嘅，唔脆；牛冇牛味，鞋口，完全係靠啲燒汁去遮醜。其實百幾蚊嘅價錢我哋都唔會妄想食到靚牛，但既然呢間餐廳以「專門店」自居，呢個質素真係有多少令人失望。反而配角們幾好，白飯係好貼心地加咗飯素，豆腐亦好滑好有豆味。忌廉咖哩牛肉烏冬 $78忌廉咖哩牛肉烏冬就出乎意料地好食，試咗啖齋忌廉，幾香幾滑。再夾埋底下啲沾滿咖哩汁嘅烏冬，唔～原來忌廉同咖哩係咁登對！碗烏冬入面都有少量牛肉，都係冇牛味兼鞋口，再少量啲都唔怕。總括嚟講，除咗牛之外，其他都幾好食。