大榮華圍村菜 (Closed)

同事做到五月尾轉工作環境，循例都要同佢食餐飯。因為佢啱啱撞親腳好多野都話唔食得，於是就由佢決定去大榮華飲茶，樣樣都有得食唔使怕。我哋一行三個人，咁啱又落大雨，佢又行到窒吓窒吓。以前嘅大榮華要等位就不在話下啦，而家可能又因為疫情，就更加少咗人。我哋叫咗好多唔同種類嘅點心，例如我至愛蝦餃、仲有出名嘅千層馬拉糕，朋友想食嘅牛肉球、煎蝦餅同灼生菜🥬，仲有蒜香鮮魷、叉燒瀨粉同埋炸兩。整親腳嘅朋友都忍唔住食咗啲用🦐做嘅點心。😜蝦肉爽口瘦叉燒唔會乾柴柴，肉嫩有汁😚千層馬拉糕我嘅印象以前係會成大籠叫㗎，仲有豬油撈飯都係呢度嘅特色不過朋友話晏晝冇得食。😛反而想講吓個灼生菜，上枱好似將一個西生菜切開一半，成個太空館咁。好懷疑佢有冇洗過㗎呢？😨炸両就真係麻麻地，條油炸鬼已經林晒啦！😖整體大致都OK嘅。不過不失！