劉興記生煎包專門店

Open Now

Now Closed

早排經過元朗，突然醒起之前食過一間生煎包店味道唔錯，附近好似有分店，諗住去再食，去到果然係最多人食嗰間。好好彩啱啱有張枱空出嚟，唔使等位，我同朋友都有啲餓，就諗住咩都叫啲黎食。 第一樣上嘅係原味上海小籠包。熱辣辣一拎起，已經見到入面嘅湯朗朗下，包皮仲係透明嘅，好薄，一睇就知皮薄餡靚。咬開啲湯汁即刻湧出嚟，味道鮮甜，食得好滿足。 跟住上嘅係我哋叫嘅兩款生煎包，分別係招牌生煎包同蟹粉生煎包。招牌嗰款已經好好食，底部煎得脆口，但唔會燶，唔會太硬，啱啱好。有之前食生煎包嘅經驗，搣開少少包皮，先飲一啖熱辣辣嘅肉汁，真係好香好濃郁。而蟹粉生煎包更鮮味，一咬落去，蟹粉嘅鮮甜味即刻釋放出嚟，睇得出佢有滿滿既蟹粉。 最後仲叫咗兩款主食，蔥油雞扒飯同雞絲粉皮。蔥油雞扒同平時食開嘅蔥油唔同，呢度係用乾蔥整嘅，估唔到有幾香。而雞絲粉皮都做得唔錯，麻醬配埋雞絲本身都好夾。最貼心嘅係，枱邊仲有張紙寫住如果唔夠麻醬可以再加，真係好細心。 總括嚟講，想要啲平價美食，呢一間絕對可以滿足到我嘅口味，不枉我一食再食。🤩 #劉興記元朗店生煎包專門店