龍皇酒家 (世貿中心) (Closed)

全team同細佬慶生，佢話想飲茶。有諗過去富豪金殿，但擔心軒尼詩道被佔領突然有變化令大家返唔到公司，所以揀咗就近世貿中心嘅龍皇。近年幟哥越開越多分店，無論新舊舖，基本上每間店我都去過。味道是好，但味精亦落得頗重手，要睇下彩數同是日身體狀態 返咗半日工，一入去對住無敵海景，成個人即刻醒神哂。生日點都要有翅的，於是叫咗個龍皇午宴C餐，4個人啱啱好。個餐得7樣嘢，加咗個點心，用指定信用卡再有甜品送，結果湊合成八、九樣，攞個意頭🍀沙巴海蝦餃食落除咗彈啲同普通蝦冇分別又冇乜鮮甜味，餃皮雖冇13摺顯得略粗糙鬆散，但仍算皮薄餡靚味道佳。 紅燒竹笙海皇翅濃鹹、芡厚薄適中，仍略有金華火腿的咸香味，當然唔期望有好多翅。沙溪燒米鴨燒來皮脆肉偏粉紅，鴨味較一般燒鴨濃又多肉唔多肥膏，應該係米鴨唔係一般淡味穀鴨 XO醬饍皇膠即西芹炒花膠，帶鹹微辣不錯。精選海上鮮係炆海魚煲，有3-4款包括斑、鱸魚等，有嚿紅色皮嘅肉好滑又有魚鮮，不過唔知咩種。自選小菜揀咗時菓咕嚕肉，炸粉漿夠薄而肉肥瘦得宜，咬落有肉汁，甜酸醬調較冇過酸，呢個餸反而睇到廚師功力👍龍皇炒飯粒粒分明唔油膩又鹹香，除咗最後加嘅炸瑤柱絲添加食味、矜貴感及作