楓林小館 (Closed)

睇到啲食評講到咁好，今日走去試，唔係唔好食，只係根本唔值咁嘅價，我就依住食評去叫，嗌咗以下嘅餸：煎封豆腐：幾好食，但釀嘅蝦肉好少，幾乎食唔出，差不多成百蚊嚟講係非常之咁唔值。椒鹽蝦：最好食係呢味，18蚊兩，嗌咗十兩。即係成180蚊。乳鴿：非常非常之咁普通，完全食唔出有乜特別。要成接近一百蚊一隻同搶冇分別。耦餅：蓮耦冇刨絲，而係一粒粒，唔好話係特別做法，呢啲係慳工夫嘅表現，只係中價酒樓嘅水平。一啲都唔惹味，屋企整仲要好過佢。由於冇菜食，自己點咗個平時食開嘅薑汁炒芥蘭，炒得唔好食，最簡單嘅菜就可以睇出呢間野嘅水平，結果現晒形。啲位坐得好迫。侍應喺我背後打爛野一地都係，啲碎片差啲整到我。埋單要$730，但我覺得只值$350，行遠少少近油站嗰間酒樓仲要好食過佢。啲裝修係好古雅，但勸大家唔好受「老字號」所騙，裝修可以將時間留住，但食物水準可以隨著時代而不斷退化。空有老字號之名而無老字號之實。