勝博殿日式炸豬排 (Closed)

去尖咀睇完戲搵野食，遇著有啲落雨唔想走咁遠就試試勝博殿，好彩唔駛等位，門口小姐話要10 點交檯，當時都係8 點零都覺得無問題。 當我地仲研究緊個餐牌個時門口小姐已經衝埋黎問落得單未。 係佢既凌厲眼神下叫左個季節二人餐，有特級炸豬扒，炸蠔2件，炸海老2件同一個蟹肉忌廉薯餅。 飯，椰菜同味噌湯係可以無限追加既。 點完菜我請佢地留底一本menu 睇下會唔會叫啲小食咁，點知轉個頭又有人黎問我地想收返個menu, 我話睇緊就打發左佢啦，點知再隔多一陣又有人要收我本menu, 既然你咁唔想我加單，我惟有俾返你啦。 轉個頭椰菜就上黎，侍應哥哥會介紹一下啲醬汁同配料既配搭。 用黎襯椰菜食既有日式胡麻醬同柚子醋。 我無試胡麻醬，但同行男人話乜味都無、平是見到胡麻醬就心心眼既佢都轉黎同我一齊食柚子醋。 啲野食未黎到我地已經瞬間KO左一兜椰菜，侍應哥哥主動問我地要唔要添，當然話好。 好快味噌湯，飯，漬物同主菜就黎到。 湯唔會太咸，昆布份量都算多。時間許可既話其實我會追加。 飯亦都好煙韌，以我平時晚黑唔食白米都食左半碗，唔錯唔錯。炸物黎喇，碟上有檸檬，岩鹽同沙律師俾你點唔同既炸物。講返炸物質素，特級豬扒，好！