稻香 (新九龍廣場) (Closed)

做冬要就老人家，近近地去左附近既新九龍廣場入面既稻香食晚飯。5點9去到佢唔俾入，話未開，心諗，乜咁嚴架咩😅6點入去攞位等老人家，唔算好多人。老人家唔食得多，食既種類又有限制，所以都係無嗌餐，散叫。蒜片焗肉排，無諗過原來係排骨，同埋有啲避風塘既風味。整體黎講，比較硬同多味精，早知係咁嗌咕嚕肉醒下胃仲好。一隻沙薑雞，賣相不俗，肉質唔鞋口。濃湯海味雜菜煲，啲菜一黎到就已經係偏黃，明顯煮得耐左。不過錯有錯著，因為煮耐左，好淋，老人家可以食多啲。一樣多味精。紅燒豆腐雜菌，老人家最愛，夠淋。