西川風味海鮮館 (Closed)

好兄弟森哥個老婆岩岩幫佢生左個慈菇錠，我地成班好兄弟一齊去醫院探佢個精靈B，之後梗要搵個地方啤啤佢兼賀一賀佢，沿住順寧道行，搵到一間雞煲食店。一坐低就叫咗支大啤，侍應哥哥好好招呼，馬上為我地送上一碟青瓜，青瓜嘅汁有少少似口水雞個汁，少少辣，少少麻，都係可以接受，加上啤酒，當然冇得彈啦。配啤酒，點可以冇炸嘢食，先黎個椒鹽炸豆腐，外面炸到金黄色，皮薄而香脆，𥚃面就如豆腐花一樣咁滑，而且好有豆香味，口感絕對唔油腻，真係另我食慾大增。 再要多個椒鹽大尾魷，大尾魷水份比魷魚重，所以食落唔會覺得乾身，仲有一種好滑嫩嘅感覺。 勁蒜開邊蒸海蝦，蒜蓉勁多，好重手，所以非常香，蝦好鮮甜，我個人認為粉絲才是精華，因為蒸嘅過程已經吸收哂海蝦所有味道。之後梗係我哋嘅主角西川重慶雞煲出場啦，由於上枱時只有8成熟，所以要再焗煮一陣，入面有好多香料同配菜，入口的第一啖，覺得好辣，但之後嘅麻辣味停留在口腔，慢慢滲出一種甜味，而且雞件非常嫩滑，越食越停唔到口。 簡直係味蕾的極級享受 !