Taste All Pate

Open Now

Now Closed

呢間新開嘅餐廳，其實想試好耐，但係佢午餐只係開星期四至星期日，所以等咗一段時間，work from home 先至有機會抽時間嘗試。星期五的午餐，店內已經有幾位OL食緊，午餐選擇都有幾款：豬扒、牛肉、魚，各樣有啲，可以自由選擇加埋甜品、沙律、湯，甜品又有款揀。先來嘅係一個沙律，蔬菜新鮮，沙律汁好refreshing，個重點就係上面的幾粒麵包糠，並唔係預先包裝的沙律麵包糠，好明顯係自己用麵包再烘，有誠意。之後我加咗一個南瓜湯，相當好飲，一定係自己整㗎。再上主菜，係梅子醬豬扒，豬扒煎得外脆，豬扒味濃，我唯一略嫌有少少熟咗啲，有少少乾，但係我好鍾意塊扒有咬口，非常好味，配有醋汁洋蔥及意粉。個意粉亦係一個重點，佢哋係用幼身意粉，煮得非常煙韌，每一條都有味道，並唔係普通用滾水淥熟嘅意粉，非常有誠意。豬扒配襯日本梅子醬，其實非常配襯唔油膩好開胃。成碟菜，其實有成四五種味道，每一種都好有特色，好食得出味道，讚！之後再加上甜品，係檸檬撻，簡簡單單，個curd 做得味道適中，個tart好脆亦好有味道。佢哋每三四個禮拜會轉Menu，我諗我嚟緊每個月都會去一次食。