吉列牛忌廉烏冬專門店 (彌敦道)

Open Now

Now Closed

之前嚟食魚麵嘅時候見到樓上有石板吉列牛同忌廉烏冬，一直都想試下，今日同同事喺附近上完堂終於有機會。同事揀咗吉列牛定食，都幾豐富，除咗主角吉列牛同加咗飯素嘅白飯，仲有蕃茄仔同麻醬豆腐兩款前菜同埋麵豉湯。吉列牛份量適中，外面炸得酥脆，可以就咁食或者放喺石板上烤。牛肉油脂均勻，放喺石板上輕輕煎一煎，入口肉質軟腍，肉汁豐富。我揀嘅牛肉咖哩忌廉烏冬亦非常有驚喜，一上枱以為係甜品，滿滿一碗好似整蛋糕用嘅甜忌廉。一夾落去原來內有乾坤，底下係濃淡適中嘅咖哩汁，香滑嘅忌廉散發住淡淡嘅奶香，同咖哩烏冬出奇地夾，成個配搭都幾驚喜。蜜糖雞翼又香又脆，牛油味好香，面頭灑上白芝麻更加香。