Crostini Bakery & Cafe (Closed)

今日落雨，唯有喺商場行下，無無聊聊諗住飲杯咖啡。依家出街都一定帶着隨行杯，減少使用一次性塑膠。餐廳而家做緊優惠，買一杯嘢飲就送$25現金卷，下次買任何飲品可以使用。我同老公分單，即係加多$4就有第二杯咖啡，都非常之抵。講番杯咖啡，兩杯都係 skimmed milk latte，但係飲落就唔同味，用餐廳個杯裝嘅嗰杯，咖啡味濃啲，唔知係咪因為店員姐姐見我個杯大啲幫我裝多咗奶。咖啡偏苦，唔算太濃郁，亦都唔太香，我坐喺咖啡機隔離，店員姐姐係隔離沖咖啡，但我都聞唔到香味。當然我唔係期望佢有Starbucks嗰一種咁浮誇嘅香味，但咖啡豆沖出嚟嗰下嘅香味我都聞唔到，就有啲奇怪，唔通呢到抽風做得太好？另外叫咗個 muffin, 朱古力味，甜咗啲，但佢加咗啲杏仁片落去，有啲誠意。但總括來講，我鍾意Starbucks 個 muffin 多啲。咖啡方面，我唔特別推薦，但如果佢繼續做呢個優惠，而咁啱又好想飲咖啡，都一飲無妨既。呢間餐廳有四個位，方便叫咗麵包或者咖啡可以坐低食下休息一下，但各位食客佔用嘅時間都唔一樣，唔好期待每一次都咁容易攞到位。