永和快餐小食店

Open Now

Now Closed

呢條巷仔雖然行過好多次,但真係冇乜食過裏面嘅餐廳.今日本來諗住遠征,但行到呢條街嗰陣嗰天越來越黑,即係個天要我喺呢度食飯啦,就即刻中左入呢間餐廳喇.咁門口嗰兩張枱各有一張辦公椅,雖然殘舊,但睇落仲舒服過我返工坐嗰張,當然即時霸咗佢啦.以茶餐廳嚟講,呢度非常靜,冇乜人傾偈.角落頭擺咗個又細又有好重雪花嘅厚電視,聽下聲就好,睇得耐會好傷眼.門口擺咗啲蛋捲放售,好似唔係出名嘅牌子.叫咗個蝦醬蒸腩肉,等咗超過十分鐘,追咗兩次單都話蒸緊.再等多幾分鐘先畀碗餐湯飲下.睇餐牌話係西洋菜煲豬骨,但係唔啱味喎,而且我淨係見到白菜啫.當係白菜湯,又淨係得淡淡嘅鹹味,到底係乜嘢湯呢?蝦醬蒸腩肉終於到啦,蝦醬味幾重,非常咸,成個碟底都係油.其中幾片腩肉有8成都係肥膏.雖然點呢個餸都預咗係鹹同埋油膩,但真係畀我食過嘅任何蝦醬腩肉都要重口味同埋油囉.為健康著想,下次(如有)都係叫第二個餸好啲喇.