Video
Read full review
2024-10-29
252 views
其實呢間《○de▽ 鯛白湯らーめん》，响香港來講都非常有名氣，大家都唔會陌生。最成功嘅地方我認為莫過於，一，佢捕捉到巿場空缺，响香港做鯛魚拉麵嘅佢係唯一一間。二，佢嘅產品係真係有質素。我大概大半年前都有食過，不過當時冇記低食評，印象已經唔深，所以重新探一探店，評一評。《鯛🐟 白湯拉麵🍜》香味 (4/5) - 香味非常夠。有別於一般魚介拉麵嘅氣味，佢個香味係高雅d，清新d。湯頭 (3.5/5) - 味道方面係好嘅，魚味係濃郁嘅，鹹度剛剛好，不過，因為呢碗係鯛白湯，所以我會預期佢個湯會同一般白湯一樣，會比較順喉絲滑。但，事實並非如此。佢個湯嘅質感其實都幾沙，同順喉絲滑好似扯唔上任何關係，我認為如果佢個名叫“鯛沙湯”或“鯛白沙湯”拉麵就更加合理得多。不得不提係，食到尾聲嘅時候，湯入面會赫然發現湯入面有唔少碎骨粉，今個湯同白湯呢兩個字嘅預期越扯越遠。另外想話，第一啖入口時，除左鯛魚嘅味道之外，仲有一股強烈嘅沙丁魚或秋刀魚嘅味道，咁就有好有唔好。好嘅係，令成個味道👅嘅層次增加，因為唔係得一款魚嘅味。唔好嘅係，鯛魚嘅獨特性會比其他魚類蓋過，因為沙丁魚或秋刀魚嘅風味都強烈。不過我明白一點，鯛魚本身嘅
《鯛🐟 白湯拉麵🍜》
鯛🐟 白湯拉麵🍜
$138
0 views
0 likes
0 comments
香味 (4/5) - 香味非常夠。有別於一般魚介拉麵嘅氣味，佢個香味係高雅d，清新d。
湯頭 (3.5/5) - 味道方面係好嘅，魚味係濃郁嘅，鹹度剛剛好，不過，因為呢碗係鯛白湯，所以我會預期佢個湯會同一般白湯一樣，會比較順喉絲滑。但，事實並非如此。佢個湯嘅質感其實都幾沙，同順喉絲滑好似扯唔上任何關係，我認為如果佢個名叫“鯛沙湯”或“鯛白沙湯”拉麵就更加合理得多。
不得不提係，食到尾聲嘅時候，湯入面會赫然發現湯入面有唔少碎骨粉，今個湯同白湯呢兩個字嘅預期越扯越遠。
另外想話，第一啖入口時，除左鯛魚嘅味道之外，仲有一股強烈嘅沙丁魚或秋刀魚嘅味道，咁就有好有唔好。好嘅係，令成個味道👅嘅層次增加，因為唔係得一款魚嘅味。唔好嘅係，鯛魚嘅獨特性會比其他魚類蓋過，因為沙丁魚或秋刀魚嘅風味都強烈。不過我明白一點，鯛魚本身嘅價格係屬於偏高，如果唔用其他價格偏低嘅魚平衡返成本，個麵嘅定價可能會過高。然而，就算用唔同嘅魚湊埋一齊，個味道都係幾好。
講開個湯，一定要提埋碗邊嘅柚子醬。可能店家想打穩陣波，怕d心急顧客會成篤撈晒落去，破壞左個平衡度，所以個醬嘅濃度係頗低，都相當淡口，柚子味都係僅僅食得出。我認為呢個柚子醬，冇特別提升到個湯嘅層次，柚子味亦唔出，可有可無。
麵條 (2.5/5) - 麵條方便，講真都相當之唔特別。佢係屬於細麵於中細麵之間，直身，個麥味唔強，而比較大嘅問題係，個麵並不爽彈，食起上來少少糊口。
配料 (3.5/5) - 首先就係鯛魚肉，响個麵嘅中間會放左一堆仔嘅鯛魚肉碎，有燒過，有刻意調味，不過食唔出佢放左咩粉，貌似七味粉但完全唔辣，估計係用甜椒乾磨粉呱。明白因為成本考慮，點都唔會比大大塊魚柳架喇，魚肉碎上口感就係有d唔滿足，不過賣相都算靚，調味香味都算足，所以都中上。
塊豬叉燒，係我食過咁多豬肩肉當中，甘香肉味係最欠奉嘅。或者，可能店家係刻意避免豬肉味會蓋過魚味呱。
荀方面，有兩塊，為配合店名，刻意切成一塊圓形⭕️，一塊三角形🔺。心機同點子係有，但最大問題係，塊荀係煮到過腍，荀應有嘅爽脆口感完全冇左，荀味亦頗淡。呢兩塊荀唯一嘅作用就係影相特別d呱，我就認真麻麻地。
溏心蛋方面，心機一定十足啦，自稱係用櫻木煙燻，係咪真係櫻木我就唔識辨別，不過煙燻味係好出，特別係蛋白部份相當夠香夠味，成隻蛋嘅完成度係相當高。
整體 - 值得小推薦 👍👍👍 唔係大推，因為佢價格偏貴，而配料同麵條嘅滿足度不足，但湯嘅味道係好，所以都小推一下。
Other Info. :
店家嘅個性非常突出，一來，產品嘅風格同呈現出黎嘅效果可以話好獨到（特別係識噴煙嘅沾麵，下次試）。二來，個店名，有邊個香港人識讀得正確呢？大部份我嘅朋友提起呢間店，都係話"食鯛魚拉面間店"，而係唔會講得出個名。無他嘅，個名咁有性格，用○同▽混入個名道，點讀喎。我以前冇特別留意，我會叫佢做 “啊嗲”，因為我以為 ○係日文個 O（お），お 係讀 “啊”, 而 de 係讀 “嗲”。但睇真d，正確嘅讀法應該係 “まるでさんかく” (Maru De Sankaku)
(The above review is the personal opinion of a user which does not represent OpenRice's point of view.)
Post
