牛魔一人燒肉

Open Now

Now Closed

平日夜晚9點半去食，得嗰幾枱，係都再迫你搭枱，周圍仲大把空位，啲梳化又污糟，有油，用濕紙巾抹完成張紙巾黑晒。周圍大把位，佢無端端帶兩位坐隔離，張枱我哋已經放咗一半食物，我哋同個侍應講，周圍咁多枱，可唔可以唔好坐得咁迫，加上張枱又冇隔板，如果搭枱，真係手踭撞手踭咁食，之後個男員工好唔滿意咁走開咗。之後有個金髮四眼男侍應同長髮女侍應講，坐得唔舒服咪食囉，仲發脾氣大力掟嘢。隔咗一陣，個男侍應報復，又特登帶第二枱兩位坐我哋隔離，其實成個場有好多兩位都係坐4人枱，佢偏要帶我哋嗰張，我就知佢想報復。我同佢講，你個場爆棚搭枱真係冇問題，但周圍都係空位，點解要啲客坐得咁迫，之後嗰兩個客都走咗去第二張枱坐，仲要係打橫坐，我哋都係打對面坐。金髮四眼男侍應唔份氣，係咁捉住長髮女侍應係度話我哋，仲要大大聲話呢度唔俾搭枱架咩，咁嘅態度真係想博俾人打，當然我哋會容忍，無謂同呢啲小朋友嘈。當晚未夠10點鐘，個金髮四眼男侍應已經不停喺門口講截咗單啦！唔做架啦！我心諗你哋收11點，10點未夠就趕客唔做生意，希望佢老闆會睇到呢篇食評，認真考慮吓請啲乜嘢質素嘅員工，而唔係請啲倒米嘅員工。