常會面長今雞煲

Open Now

Now Closed

約咗朋友即興去食雞煲，本身就去筲箕灣嘅鋒記小炒王，點知一去到原來佢星期一休息，一場黎到冇理由打退堂鼓架。於是去咗隔離果間-常會面長今雞煲 試下。 由於星期一冇咩人所以唔使等，即刻有得入。雞煲店緊係叫雞啦，本身諗住叫半隻再加打邊爐就算，店員話半隻好細，會唔夠食，於是聽佢講叫咗一隻。佢比咗個桶我地擺雞骨，都幾好，一方面冇咁污糟，另一方面佢都可以做少啲。雞煲黎到，店員幫我地整，一路煲緊果陣，啲麻辣味一路蒸出黎，幾香，但聞得多會令到個鼻痕痕地。煲咗一陣，經間店員黎翻咗幾次，之後佢話食得，開得餐！雞好惹味，配料都幾多，開頭食唔係幾辣，但有麻嘅感覺，之後越食越覺得辣，可能我捱唔到辣，朋友話冇咩嘢。食完個煲其實都有七八成飽，之後我地叫咗美國肥牛，貢丸同自家水餃。肥牛普普通通但索哂啲汁都好好味。貢丸都唔會有油膱味，幾好食。水餃係自家制韮菜餃，係新鮮料包嘅，好好食。好友相聚緊係要啤一啤，店員話青島有優惠，我地叫咗6枝青島$98。佢啤酒全部都係細枝裝。食辣野配啤酒加吹水一流。如果人多可以叫多啲野食，有機會會再黎。