元朗新記 (吳松街)

Open Now

Now Closed

自從元朗新記雞粥喺佐敦開咗分店後，唔使下下走到入元朗就可以食到佢哋嘅招牌雞粥，真係好方便。除咗食招牌貴妃雞粥，我今日仲叫咗紅燒元朗脆皮乳鴿、炸蒜蓉雞翼尖同埋豬膶炒麵。招牌貴妃雞粥我近乎每次都會點，因為真係好好食。粥底軟棉又有雞味，雞又香又滑。最好係份量適中，食完粥仲可以食到其他嘢食。另一款經常點嚟食嘅，就係紅燒元朗脆皮乳鴿。乳鴿皮脆肉嫩，即叫即炸，上枱時仲熱辣辣嘅。依個乳鴿一定要趁熱食呀。今次點咗依道炸蒜蓉雞翼尖小食。估唔到一份有咁多隻翼尖。翼尖係脆炸，入口非常香脆，唔點醬已經好好食。但點咗醬汁後，完完全全變咗另一個口味。一碟翼尖，可以有兩種食法。食粥品，通常都會叫返碟炒麵或者炒米粉。炒麵略嫌普通？可以叫依個豬膶炒麵。炒麵夠乾身，亦麵夠豉油重香味，豬膶同炒麵一齊兜熟，豬膶炒得好好，外面脆，內裡剛剛熟，彷彿有入口即融嘅感覺、煎鵝肝般嘅口感。超掂。