稻成小館 (Closed)

見到佢哋有得食片皮鴨，就去試一試。如果就咁叫半隻片皮鴨，要$208。見到佢哋有個二人餐， $400多啲，個餐入面已經可以揀半隻片皮鴨，所以就叫個二人餐啦。個餐入面，除咗半隻片皮鴨，仲揀咗四隻小籠包同埋一碟奶油津白。個餐會包兩碗飯同埋兩隻高力豆沙做甜品。額外再叫多咗一個咕嚕肉同埋抄手。首先服務員態度非常好，有耐性介紹菜式。上菜速度亦都幾快。環境不過不失，算係舒服嘅。片皮鴨嘅話，鴨皮鴨肉分開，適合一啲可能只係鍾意食皮唔食肉嘅人。鴨皮部份其實鴨香唔重，冇乜油份。鴨肉反而多啲鴨香，亦都唔會好乾柴，反而幾Juicy. 奶油津白幾好味，抄手辣到適中，就算唔食得辣嘅人都應該接受得到。小籠包皮薄多汁。高力豆沙都唔錯。鬆軟，又唔會太甜。整體來講，味道唔錯。唔可以話超級好味，應該算中上。坐得又舒服，好過啲平但係一大陣味嘅酒樓。