香港華商銀行公會

Open Now

Now Closed

中環寫字樓大廈内其實有唔少商會或會館餐館，不過大多只招待會員。好似今次一有機會就必定掹衫尾嚐味。餐館位於五樓商業大廈，踏出電梯即見商會會員銀行列表幾巴閉咁。坐低環顧四周食客多數品嚐家常小菜。第一份上檯嘅係松茸螺頭燉水鴨湯，湯水清澈，水鴨加雞腳燉煮，鮮甜香味唔在講，連油都唔多先至好嘢，入口後味蕾更加感受到滴滴都係精華，松茸、螺頭、水鴨等湯料都仲可以食得出鮮味，新鮮食材可見一班。 接著下個菜鮮百合夜香花炒蓮藕片，蓮藕片片超爽口清甜，加入鮮百合與夜香花完全係清新健康嘅選擇。食完清淡食濃味獅城蝦球，無殼蝦球大大嚿又啖啖肉，蝦肉鮮味亦無被香辣開胃嘅醬汁蓋過，刺激嘅醬料助煎米餅食用絕對比白飯更加美味合適。最後咖哩牛筋腩煲，牛筋淋腩肉嫩咖哩香唔太辣，鍾意刺激但係又唔食得太辣就啱晒。雖然是次晚飯人少少，只可以食三餸一湯，不過幾碟都食出選料新鮮，食過幾碟後完全明理解左右食客都點家常菜就係為品嚐呢度嘅新鮮食材。期待下次咁嘅部機會快啲出現。