譽小館 (Changed Hand) New Restaurant

食Tea 就食得多，真正嘆下午茶真係好少，多謝外邊事故多，所以今日變相 “被得閒”，可以陪屋企人嘆下午茶。話明係下午茶，當然有特價抵食嘢推出，”下午茶自由配” $32乍，可選兩款點心，唔使問阿桂，緊係揀我至愛的 “鮮蝦炸雲吞” 和 “椰汁紅豆糕”。其他的點心選擇就交俾阿媽去揀。炸雲吞: 一碟竟然有4隻，好少見。好脆口，又多蝦肉。椰汁紅豆糕: 椰汁味好出，仲有超多紅豆，又唔太甜，好味道。譽小館蝦餃皇: 細細粒，皮薄餡靚，一啖一粒，不知幾滋味。鵪鶉蛋燒賣: 熱辣辣，鵪鶉蛋的味道果然較雞蛋香。山竹牛肉球: 好大粒，又係熱辣辣，調味唔錯。阿媽始終都係要啲米氣落肚，但又唔想食飯，所以叫咗 “荔灣艇仔粥”，粥底綿綿滑滑，料又足。最後仲有柱侯牛筋腩麵，牛腩炆得好熟，麵底爽口。食得好飽，今晚餐飯可以唔使咁早食。