原味棧 (Closed)

出名鍾意食火鍋嘅我哋，酷熱天氣警告下都無阻我哋嘅雅興。我同M佬收工之後，坐船拍吓拖就去到紅磡。紅磡嘅餐廳真係卧虎藏龍，選擇多之餘，名氣小店更加多不勝數！今日就去到崇潔街嘅原味棧試試呢個半自助火鍋啦！龍穿鳳（楜椒海蝦雞窩）呢度有多款湯底，我哋就揀咗半隻龍穿鳳（楜椒海蝦雞窩），但如果好似我咁，想食辣啲就要自己調吓味，加啲辣椒喇。鍋入面有好多莞茜，湯底夠晒香濃入味，好好味！而索晒汁嘅雞肉，肉質好嫩滑，配合埋濃郁嘅湯底，真係好入味呀。而海蝦就夠晒彈牙。海鮮拼盤食到咁上下，店員送上海鮮拼盤，份量依據人數而定，而海鮮就依據當日嘅新鮮選材而定。今日就有龍蝦、鮑魚、花蟹、蝦、蜆、蟶子、青口等。份量十足之餘，上枱嘅時候，大部份海鮮仲郁吓郁吓，真係夠晒新鮮，味道鮮甜又彈牙。除咗海鮮仲可以多款食物可以任叫任食！其中一定要試吓呢個安格斯肥牛，肉質鮮嫩，牛味豐富。以呢個價位真係相當不錯！