日日香鵝肉飯店 (和富中心) (Closed)

上次吃過紅磡店,今次經過和富中心見到又心癢癢就走入去食,由於鋪頭喺地庫,人唔算多,坐得非常寬鬆舒適。我哋二人叫咗一個獅頭鵝皇飯同獅頭鵝肉飯,仲加多兩杯飲品。獅頭鵝皇飯好豐富,有鵝片、鵝肝、鵝腸、鹵豆卜、鹵水蛋…希望冇數漏,用一個大碗載曬咁多材料,睇見就流曬口水。我叫嘅獅頭鵝肉飯,分別就係冇咗鵝肝同鵝腸,真係覺得有啲遺憾。首先冇得食好爽口嘅鵝腸!又冇得食潮式鵝肝! 雖然鵝肝size唔大,但係做得唔錯。可惜我心裏面仍然念念不忘想當年喺潮州食嘅鵝肝,入口溶化不油不膩嘅鵝肝,同西式煎鵝肝嘅方法不能相提並論,好神奇嘅口感,真係食到有飄飄然嘅感覺!好似太誇張㖭,總之暫時香港都未揾得到。一邊食飯一邊見到旁邊嘅電視不停loop謝霆鋒同楊千樺,講佢地去食呢間鹵水鵝嘅節目片段,仲有大大嘅poster,寫住"澄海鹵",係國家非物質文化遺產喎!我諗呢間鋪頭喺國內真係唔惹少,香港仲有好幾間分店。呢間舖頭諗到用碟頭飯嘅形式賣鹵水鵝,經濟實惠,啱曬我呢啲有時想食鹵水鵝,又唔想買半隻咁多嘅人。整體食物水準真係唔錯,如果唔係我都唔會番食其他分店啦。