潮庭 (Closed)

朋友買咗個團購餐， 吹雞約埋去食飯，我好耐冇嚟和記大廈嘅潮庭， 呢間環境寛濶，唔會坐得太逼狹。個四人份量團購餐價值$638， 頭盤先上三小碟，用英式下午茶嗰種三層盤裝住， 幾骨子㗎! 第一層係鹵水豆腐伴鵝片，肉質尚算嫩滑！第二層係小黃瓜拌海蜇，最底一層係豬腳凍， 豬腳汁精華雪凍之後，好似果凍咁滑滑 ，入口即溶， 好鮮味!第二度菜係蟹肉花膠絲素菜羹 ，蟹肉唔算多， 素菜清清地， 唔會太重味，幾好!第三個係芝士焗龍蝦伊麵, 略嫌芡汁太多, 有改進空間!第四個係葡汁雞球伴燒餅, 椰汁味好濃， 不愧係偷飯賊，惹味開胃，不過燒餅就比較油膩！第五個係奶湯枝竹浸翡翠， 材料幾豐富吓， 有支竹、銀杏、杞子同小豆苗。第六個，亦係最後一道菜，就係南瓜咸肉粒炒飯。 如果南瓜煮得淋啲，嗰飯炒得透啲，會更加好味㗎！