Thirty First of May (Closed)

今日同朋友黎荃灣行街，發現呢間西餐廳，比裝修吸引左，又見店員好熱情咁招待我地，所以入左黎食晚餐。湯好creamy入口香滑偏杰身，食到粒粒蘑菇碎，好夠菇味非常濃郁，帶黑松露味好香。湯份量都幾多，幾有飽肚感。餐包好脆身，用上中式蒸籠好特別，醬料酸酸甜甜好食又令人開胃，賣相唔錯又不失趣味。凱薩沙津，用左較少既沙津醬，食落清新d，菜都好新鮮配上煙肉碎，夠爽口。卡邦尼意粉、24個月巴馬臣芝士意粉都幾大碟，怖滿一片片薄薄既巴馬臣芝士。意粉比較硬身，帶點彈牙，非常有咀嚼感。芝士味鹹香濃郁，但此終係芝士都會覺得有dd膩。美國頂級安格斯西冷牛扒order要五成熟，上菜似七成熟左右，略嫌熟左d，但肉質幾好就算熟左少少都唔會韌。牛扒有10安士好大塊，都帶些少肥肉，煎起來肉味香濃，又夠牛味，點埋燒汁好滋味。牛扒面層有灑上左少量海鹽，加左反而偏咸，不過overall都唔錯。伴碟既薯蓉又香又滑！價錢同一般西餐廳差唔多，環境呢到就好唔錯。大大個月亮裝飾，氣氛溫馨浪漫，燈光又柔和，係到坐低食野真係感覺好舒適。仲有2張戶外枱，天氣唔太熱坐出去都幾好。位置離荃灣廣場好近。