一葉台灣料理

Open Now

Now Closed

放工係附近搵間餐廳食晚餐，聽朋友講一葉好好食，佢lunch time經常嗌呢間外賣，一於嚟試下。當日叫咗一碗鹽酥雞排配台式蔥油拌面同埋豬排古早味家鄉拌面。雞排外酥內嫩，外皮炸得金黃香脆，雞肉有肉汁，有種去咗台灣夜市食大雞排嘅感覺麵條煮得啱啱好，唔會煮到淋曬。麵條質地偏厚實有筋道，口感唔錯，撈埋蔥油，色澤吸引。家鄉拌面面頭就鋪咗啲肉碎，拌上蝦油，有蝦米嘅鹹香。兩款拌面都係經典台灣菜，好開心係香港都可以食到正宗台灣料理。餐廳位置就腳，係正鰂魚涌B出口隔離，環境衛生，乾淨企理。Menu都有好多小菜、水餃、台式甜品等等，晚餐同屋企人朋友聚餐都適合。餐廳嘅名都好有詩意，原來係一葉知秋，香港最舒服而難得嘅秋季，同一碗難能可貴嘅美味台灣comfort food，相得益彰。