陳根記 (Moved) New Location

好少入黎沙田行街，行完想食晚飯之際，醒起朋友之前有提沙田有個好地道嘅大排檔陳根記，難得黎到，梗係要順道食埋啦~未黎過呢度，所以揸車都搵咗一陣個入口。最後見有個停車埸，就唸住泊好車再行落黎搵，點知一入停車埸就見到大大間陳根記。八點鐘黎到，已經係超級多人。侍應話咁啱有張細枱，就叫我地過去坐。唸住叫侍應落單，但侍應叫我地自己寫。孜然一條骨 $70 - 超愛孜然嘅味道，所以叫咗呢款小菜。豬肉嫰滑有肉汁，咬落啖啖肉，但略嫌孜然粉唔多夠，再加多d會更惹味。椒鹽鮮魷 $78 - 鮮魷蘸上薄薄炸粉，炸得好香脆，魷魚厚肉彈牙。點埋個椒鹽同喼汁，食到停唔到口。豉椒鵝腸 $70 - 鵝腸係食大排檔必點。鵝腸炒得夠晒鑊氣，夠爽口。我自己覺得用豉椒炒係最正，汁好濃，惹味~ 可樂隔離有間甜品店，見我地差唔多食飽，走過黎俾咗張甜品紙我地。又幾識做生意喎~見都幾吸引，又試下啦。芒果一口脆 (八件) $36 - 即叫即整。外層脆皮新鮮熱辣，入面個芒果肉係冰鎮過，所以外脆內凍。配埋底部好多嘅鮮忌廉一齊食，口感好豐富，又真係好好食。