食道樂 (嘉華大廈) (Closed)

今日放工後同老公去荃灣廣場睇犯罪都市2，睇完韓片自然想食韓國菜，上網搵到戲院附近有間特色小店，於是就去幫襯吓。餐廳佈置好可愛，好有韓國感覺，佢哋用咗課室做主題，入到去好似返咗去中學年代，好年輕好青春。老闆同老闆娘都係韓國人，老闆話所有泡菜、小食、主菜、湯等，全部都係佢哋自己製造，真材實料，絕對無用包裝食品，好有誠意，味道都好地道。我哋都想飲啲熱湯，於是點咗哩度嘅人氣菜式—一隻雞鍋🐓同煎餃子🥟。1️⃣ 一隻雞鍋 🐓🍲 $318雞湯好濃郁好新鮮，熱辣辣，飲嘅時候好暖胃好舒服，忍唔住一碗接一碗咁飲。雞鍋裡面除咗雞之外，仲有紅蘿蔔🥕、薯仔🥔、蒜頭🧄等配菜，另外仲有一碟韓國刀削麵，外型有啲似烏冬，煙韌彈牙，口感一流！最好味嘅係最後加入米飯🍚再煮成粥，鮮味十足，十分入味！老闆話哩個雞鍋係東大門名菜，正🤤！2️⃣ 煎餃子 🥟 $68餃子炸到脆卜卜，裡面嘅豬肉好香。再加入老闆親自調配嘅柚子醬汁，好味😋！想大讚個柚子汁，十分清新開胃，濃郁惹味。一定會再幫襯❤