泰醉 (Closed)

朋友介紹長沙灣呢間抵食又高質嘅泰國餐廳，趁假期專登同屋企人嚟試下。餐廳由泰國廚師主理，主打正宗泰國菜，店內裝潢亮眼，油畫牆身，配以場內嘅霓虹燈裝飾，情調十足，氣氛一流！先嚟一客泰式串燒 ($88)，豬牛雞各 2 串，份量啱啱好。豬肉入味、牛肉有咬口、雞肉嫩腍有肉汁，再配埋甜甜哋、充滿花生粒嘅香濃沙嗲醬，一試難忘👍蒜蓉條條包 ($42)  味道同造型都有別於一般蒜蓉包，長條型，每個切面都烘到金黃色，入口外脆內鬆軟，蒜蓉香味爆燈。甲拋肉碎煎蛋飯 ($78)  肉碎炒得啱啱好，肥瘦適中，帶油香又唔覺肥膩，加上切得細碎嘅小辣椒，入口香辣惹味，配埋隻燶邊流心煎蛋一齊食，真係無得輸。蒜蓉炒雜菜 ($68) 雜菜份量好足，有芥蘭、椰菜、紅蘿蔔、雲耳同雜菇，蒜蓉香味濃郁，用嚟炒菜，風味絕佳。食泰菜梗係要飲埋泰式飲品，點咗杯泰奶茶 ($28) 同 泰檸茶 ($24)，泰奶茶茶味芳香；泰檸茶味道酸酸甜甜，醒胃又解渴。最後食埋甜品先走，揀咗客班蘭千層糕 ($35)  千層糕賣相好靚，造成花朵狀，入口煙韌軟糯，椰汁班蘭香氣突出，好睇又好食。