雞煲王 (Closed)

作為島民，我係永遠唔會再去果度食架啦。食左4次，3次都有問題。第一次，叫農家小炒，上左小炒王，話呢個仲貴啦，咁我以為係收返農家小炒價格先會咁講，點知埋單都係按小炒王收，算，30蚊，豪俾你。第二次，真係週日到處都無位，焗住要去，叫兩個菜，其中一個菠蘿骨幫我x2，我叫她改，她話一陣間，我怕她忙起上來真係落左兩碟俾我，又要我硬食，我好堅持要她立刻改，她個樣超唔happy。本來唔想再幫襯，但有鄰居寫話依家好左，所以心思思又試過。第三次，有飯有糖水送，平安渡過。第四次上個禮拜，同鄰居結伴前往，見牆上有西蘭花炒班球，就點左。上面無價錢。後來先知168，細碟到⋯⋯仲要係粟米班腩果種魚塊（如圖）。你俾啲新鮮嘢都無咁慶啊。埋單4個人，500幾，走既時候，個靚女仲係後面加一句，喂，你地未埋單喔。我地完全唔想理她，趕住去百佳買嘢食啊⋯⋯