三姐松記糖水 (Closed)

晚飯後，當然係時候啟動另一個胃啦！店內環境不錯，枱與枱之間濶落，坐得舒適，店員亦非常有禮貌，加分。三姐松記的甜品選擇非常多，有凍食的，有熱食的，有傳統的紅豆沙芝麻糊等，亦有新派的班戟，心太軟等，還有雞翼等鹹點，啱晒不同人的口味。而我就叫了一個令人喜惡分明的甜品 – 榴槤處處。榴槤處處好似出奇蛋咁，一次過滿足三個願望，因為一個甜品，有三款不同口味，正。D24榴槤班戟，忌廉與榴槤肉比例一流，榴槤肉又香又甜又美味，而且份量亦多；D24榴槤紫米露，榴槤肉同樣又甜又美味，紫米露的質感不杰身亦不過甜，我鐘意；榴槤雪糕，啖啖榴槤味，將榴槤整成雪葩，感覺好清新。整個甜品的配搭一流，絶對推介比鐘意食榴槤的人。然後叫了一個清甜椰皇凍，原個的椰皇配上新鮮椰皇水整成的椰皇啫喱，令人賞心悅目。以椰皇水整成的椰皇啫喱，清潤得來又美味。我們還叫了一個比利時朱古力心太軟配益力多雪糕。心太軟賣相美麗，朱古力香濃，心太軟亦有流心，配上清新的益力多雪糕，非常配合。