Cafe 1950歐陸餐廳 (Closed)

今日同朋友係大圍踩單車，踩到鬼咁攰，於是係附近搵野食，跟住俾我發現到間好野，間野門面當眼位置寫住「無限添飲」，真心岩岩晒我地呢啲出左成身汗嘅。一入舖頭就發現呢間野裝修都算唔錯，地方夠大，空氣夠足。。。一坐低無幾耐，跟住我地成班餓鬼就瘋狂咁叫野食。之後首先上黎嘅野食係煙三文魚沙律，個份量同賣相真係ok喎，黑醋配埋啲爽脆嘅沙律菜，同埋鮮美嘅煙三文魚，真係開胃。白酒忌廉藍青口 -青口肉質不錯，但係啲汁唔夠味，如果可以濃味一啲會更好。韓式拉芝士辛辣泡菜雞肉石板飯，呢個韓式拉芝士辛辣泡菜雞肉石板飯真係令我好驚喜!真係無諗過會有咁多芝士碎，仲熱騰騰咁上碟，而且啲雞肉又唔係老，都幾嫩口，捲埋啲芝士一齊食，仲要配埋一大碗白飯，真係正到爆。德國鹹豬手，豬手外面表皮變得金黃脆身，食落去又脆卜卜，肉質幼滑，而且又好香，而且價錢比起外面又唔會太貴。總括黎講，呢度就真係幾正，咁嘅價錢，有咁好質素嘅食物，就實在太令人滿意喇。