南記粉麵 (Moved) New Location

響銅鑼灣睇完專科醫生，窮到燶左，但都要食飯架，惟有搵間平平地既，彌補一下荷包既嚴重創傷。一向都知南記評分高，又就腳，就去試下。南記門口好窄，但入到去原來有兩層，大把位，唔駛等，正！四寶紫菜河 ($37)，有招牌春卷、牛丸、魚蛋、墨丸，清湯湯底夠味，唔會水鬼尿，已經成功左一半；三種丸都夠彈牙，魚蛋絕無腥味，唔錯；最後試下招牌春卷，面頭係炸過既，入面係魚肉，好惹味，加埋紫菜，好好味！酸辣小窩 ($34)，揀左魚腐同招牌春卷。湯底酸多過辣，啱我食；個底有唔少芽菜、酸菜等配料，夠爽口；魚腐夠腍，有魚味。相比起清湯，酸辣湯更滋味。兩碗夾埋先$71，合乎經濟原則，而且味道確係唔錯，下次要再黎先得。