陶園燒臘飯店 (Closed)

今日去咗佐敦探朋友，回程時打算到附近買些燒味回家做餸。友人提議我去寶靈街嗰間「陶園燒臘飯店」陣料，原來佢係常客，經常過嚟幫襯。聽朋友講，店鋪係區內嘅老字號，開業超過半世紀，所有燒味都是自家醃製，店內即燒，而且價錢相當親民，所以一直都好受附近嘅街坊歡迎。 鋪頭嘅燒味選擇果然不少，除咗燒鵝、切雞、油雞、叉燒、腩仔等之外，仲有滷水鴨、滷水鵝、豬大腸等供應。買咗燒鵝下庄 ($120) 同 燒排骨 ($46)，兩大盒，拿上手已知斤兩十足，非常墜手。盒燒鵝色水好靚，鵝皮色澤均匀，皮肉飽滿得嚟又夠脹身，入口香脆酥化。鵝肉斬至大小均一，肉質挺嫩滑，調味亦恰好，不太鹹也不過淡，肉香脂香兼備。至於盒燒排骨亦值得推薦，平日最怕就係食骨多肉少的燒排骨，不過呢度嘅燒排骨就剛好相反，幾乎係啖啖肉，而且肉質好鬆化，連骨都夠晒入味，帶肥脂的部份更是甘香可口。見到佢哋嘅獅頭鵝、鵝掌、鵝翼等，賣相都好吸引，下次經過開呢頭一定會再過嚟試下佢哋嘅滷水。