Fun Fun 串串鍋 (Closed)

今日約咗個非常食得辣嘅大胃王食晚飯，所以我已經估到佢會想食麻辣火鍋，搵餐廳時見到依間開張無耐嘅四川串串鍋，仲要係限時任食，而且位於旺角，位置都相當方便我哋，就二話不說揀咗佢啦。首先雖然店面唔大，但環境乾淨，而且食物嘅選擇亦都非常多，雪櫃入面自取嘅食物非常多選擇，各丸類、菜類、肉類以及麵嘅種類都好多。飲品同甜品嘅選擇都有好多，仲有比較少見嘅飲品揀。而除咗有雪櫃擺放嘅食物外，各枱面上都放咗可以揀選其他肉類、海鮮同湯底嘅點菜紙。湯底方面我哋就揀咗中麻辣同胡椒酸菜豬肚湯，麻辣嘅中辣辣度非常夠，胡椒酸菜豬肚湯就味道啱啱好，連埋酸菜食好惹味。雖然湯底夠味，但餐廳都有好多醬料提供。本人就覺得辣椒牛肉同蕃茜牛肉都好好味。魷魚都出色，爽口彈牙。追加配料嘅安格斯牛肉非常出色，我哋都不停encore。最後食返個薯粉同甜品真係非常飽。埋單人均只需要$176.5，通常食依種四川串串麻辣鍋都比較貴，依間可以限時任食，又抵食又好味，一定會再黎幫襯。