好湯好麵

Open Now

Now Closed

大圍尼間好湯好麵聞名已久，但每次嚟都大排長龍，令人卻步。難得今晚清閒，加上經過時人唔多，於是就決定排隊食麵喇。阿仔今次係第二次嚟，佢介紹我食好頭好尾，可惜輪到我時已經賣晒，所以我就要咗碗海龍皇湯，阿仔嗌咗黑口黑麵。老實講，我碗海龍皇湯的湯底喺濃郁嘅，亦都好好飲，但係並唔係我在香港飲到最好嘅蝦湯底，加上啲麵碌得有少少唔夠熟（真係有啲生硬，碌多20秒會好啲），所以整體上有少少失望。當然，食到後來啲麵喺好咗，因為巳經熟透，但係第一印象巳經喺ruin 咗。碗海龍皇有隻飽滿生蠔、墨魚滑、兩隻非常新鮮彈牙嘅大蝦，餐廳仲俾埋手套方便剝蝦殼, 非常為客人著想。阿仔碗黑口黑麵因為有墨魚汁，所以餐廰俾咗件「口水巾」，算係貼心。黑口黑麵主要有魷魚及墨魚，我試咗一羹湯, 味道好，但係唔係我杯茶，下次嚟都應該唔會嗌佢。因為係米芝蓮餐廳，所以預咗係貴。雖然今日嘅經驗唔係話太好，但係都會回頭，繼續試佢哋其他的湯麵。