蠔燒

Open Now

Now Closed

當你開工開到好晏，而且又好肚餓既時候，最好既選擇應該係油尖旺區，但對於我地呢啲新界中區既朋友實在係太遙遠，好彩我地仲有大圍呢個宵夜城，有打冷，燒烤，糖水，車仔麵，應有盡有。蠔燒，我已經唔記得第幾次食，開左幾年，食物質素算係中上，而且佢每款食物都有3個口味俾你選，分別係蜜糖，沙嗲，重慶燒。照舊，大啤一支，再將紙仔拎俾店員，由於即叫即燒，都要等十零分鐘。蜜糖雞翼，係雞翼中間介左一刀，方便入味，雞翼唔會太乾，仲有肉汁，調味整體良好。蒜蓉牛油焗金菇，牛油味無揮發得嚴重，蒜蓉好多，食落滿口牛油味。啤酒迷必叫下酒菜，燒魷魚乾，飲啤酒既朋友，最岩叫呢個，乾身，薄肉位脆，點少少辣椒豉油，呷上一口啤酒，無可匹敵。如果你又係夜晚收工，想飲一啖收工既啤酒同埋治療下你寂寞既胃，我非常推薦你黎蠔燒。