翠林辣蟹舫

避風塘炒蟹喺香港都係歷史悠久嘅代表作，好味夾大件，未必真係有，成日聽朋友講話呢間好味，一直都未有機會試，尋日行過尖沙咀突然間見到佢招牌，個肚又餓到都打鼓，於是膽粗粗去試吓。因為實在太肚餓，兩個人叫咗好多嘢食。招牌避風塘炒蟹：一嚟到已經賣相出眾，肉蟹非常多肉，佢嘅炸蒜蓉唔會好辣，辣味少少恰到好處，不過有啲鹹。紫羅炒牛仔肉：牛肉都好滑，子薑酸酸甜甜咁，幾開胃。不過子薑如果多啲就好啦。潮式酸菜魚：同一般我哋食開嘅酸菜魚唔同，佢都好酸，同埋有潮州既辣。食神炒飯：夥計話係最出名嘅炒飯，佢有幾種米炒埋，真係好好食，同埋健康嘅穀米，食落唔會好肥。黃金蝦球：食落去先知係鹹蛋黃味，好脆口。飽到頂上心口，整體都唔錯。