新志興至尊燒鵝大王

Open Now

Now Closed

星期六日放下假，有時瞓覺都會瞓晏啲，瞓醒咗想去飲茶，但係早茶又過咗。有邊度好去處？就去牛池灣呢一間舊式嘅點心酒樓，環境方面，當然唔可以要求好似一般酒樓咁，不過都有得揀有冷氣嘅位置或者坐喺街出便，我咁識嘆當然要有冷氣啦！唔係食都食唔落。入到去，一定係搭枱坐㗎喇，入邊男女老少，一家人或者單身一族都有，點心都唔算少，有好多嘢揀，每樣都大大份，嗰粒牛肉呀真係可以一龍等於出面酒樓嘅兩龍嘅。味道方面都唔差，起碼比起一啲屋邨嘅酒樓，好味好多冇咁多油。雖然環境好似唔係好乾淨，但係佢真係用超滾水畀你清洗餐具，感覺上，好似好消毒。好過一啲酒樓，用膠嘅油淋淋，洗極都洗唔乾淨，所以有時放假得閒嚟飲下茶，都幾好㗎！