紅橋 (Closed)

今日又同個同事出咗旺角做嘢，就隨意搵咗一間餐廳食個quick lunch，選址紅橋。睇完餐牌之後就可以利用QR code喺手機自助落單，非常方便。揀咗一個set lunch，餐湯顏色好特別，紫色嘅忌廉湯真係好少有，原來係香芋忌廉湯。香芋忌廉湯入面仲有香芋同粟米，口感豐富。意式茄茸煙鴨胸燴闊條麵有好多煙鴨胸同其他配料，配合闊條麵食出唔同層次。龍蝦汁海鮮意大利飯有好多唔同海鮮，包括有大蝦、珍珠帶子、蟹肉、蜆肉，配合龍蝦汁同洋蔥，好味到唔使10分鐘就食晒。另外仲叫咗一客芝心雞翼，原來呢個係已經去咗骨嘅釀雞翼，啖啖肉啱晒我。最後飲番杯跟餐嘅熱檸茶，茶味夠濃，仲有多片檸檬。