Cafe 1950歐陸餐廳 (Closed)

「為食星球人覓食之旅 (1)」今日去美林商場覓食，途經「歐陸cafe 1950」已經比佢歐陸風格吸引住，見到門口有好多人排隊，心諗應該都OK掛，所以最後都排隊等位，因為我一個人，所以最後都係排左一陣就入到去坐低啦～～*真係冇諗過商場入邊都會有一個裝修得咁靚、咁童話嘅地方。一坐低就覺得好舒服，完全好似置身喺外地咁，特別鍾意佢牆上面掛住好似星星嘅吊燈裝飾，唔怪得知可以吸引到咁多一家大細嚟食飯啦～～～*  單點咗個「焗芝士粟米煎魚柳飯」，一上枱我都心裡面：「嘩！」咗一聲，因為冇諗過焗飯個魚柳仲大過隻碟，仲要係成條魚柳上，而唔係得半條，又或者剪開一塊塊鋪面。芝士就同普通茶餐廳食到嘅差不多，好味道，而個焗飯飯嘅軟硬度亦都適中，唔會焗到太乾有飯焦。成個好快就比我「美人照鏡」啦～～～lol大眾化價錢可以享受到舒適休閑感覺，下次一定會再嚟，試下佢哋嘅招牌麵包磚先得！☆*:.｡. o(≧▽≦)o .｡.:*☆P.S. 雖然環境係好悠遊嘅咖啡室，但係因為好多一家大細帶埋小朋友，所以有時都覺得比較熱鬧同嘈少少，但係都可以接受。