傅記餃子粉麵 (Closed)

上openrice無意發現到呢到有我摯愛嘅大陸式腸粉，今日同同事渣車過去試下。一入鋪頭坐低就見到枱上雜誌話老闆係滿族東北人，招牌菜係番茄雞蛋打鹵麵，所以立即order。分量好多，類似我係山西食番茄蛋刀削麵，番茄蛋同d麵撈埋一齊食。麵嘅質地好好食。除左麵，我當然仲會order腸粉。大陸抽屜式腸粉係香港好少有，呢種腸粉通常可以加入雞蛋肉，再配合甜豉油，直情可以當作早餐。我一路食，老闆就同我吹下水，問我味道如何？仲同我講佢地d麵係自己打。小鋪特色，簡單唔整色整水嘅食物加上老闆嘅人情味，我肯定encore。