Video
Read full review
2010-09-06
2 views
旺角區人多車多，襯有事到旺角，但啱啱又遇上1號波下既滂沱大雨，為左我心中既老苔目，行幾條街衫都濕曬！大雨下仍有客人响門口等位，不過唔算人多，暫時企响隔離個大廈門口避雨先。老苔目一直係我想試既菜式，源於細時住過柴灣徙置區 (則7層大廈)，後街有檔狗仔粥，檔主係人人都叫佢做九嬸既女仕。狗仔粥入面既粉條係九嬸親手做，顏色同形狀都似銀針粉，兩頭尖中間肥，但可見粉身粗糙唔平滑，每條形狀長短都各有參差，質地軟綿。配上 Home Feel 既白色湯底、香脆既豬油渣同小許蝦米碎，一碗清甜帶香又飽肚既狗仔粥就成為街坊既美食。徙置區清拆後，再揾唔番狗仔粥，其後有人做過豬油渣麵，但完全唔係果回事，事關九嬸既粉條係精心炮製既，有著自家製特色，而老苔目既米粉條形狀甚有九嬸影子，又係自家製，所以一直被吸引著。終於輪到我地好開心，一共只有6張4人枱，兩張2人枱，最初以為可以獨佔1枱，點知侍應話落大雨想輪候客人可以盡早入座，咁我地都好理解，但侍應見我地東西比較多，好快又幫我地轉到一個自成一角既座位，真係正！ 老苔目：老苔目粉條係用米漿 "顏" 成，食落確實有米香，可見真材實料，用心製作。湯底食味温和，一d 都唔覺過鹹
老苔目一直係我想試既菜式，源於細時住過柴灣徙置區 (則7層大廈)，後街有檔狗仔粥，檔主係人人都叫佢做九嬸既女仕。狗仔粥入面既粉條係九嬸親手做，顏色同形狀都似銀針粉，兩頭尖中間肥，但可見粉身粗糙唔平滑，每條形狀長短都各有參差，質地軟綿。配上 Home Feel 既白色湯底、香脆既豬油渣同小許蝦米碎，一碗清甜帶香又飽肚既狗仔粥就成為街坊既美食。徙置區清拆後，再揾唔番狗仔粥，其後有人做過豬油渣麵，但完全唔係果回事，事關九嬸既粉條係精心炮製既，有著自家製特色，而老苔目既米粉條形狀甚有九嬸影子，又係自家製，所以一直被吸引著。
終於輪到我地好開心，一共只有6張4人枱，兩張2人枱，最初以為可以獨佔1枱，點知侍應話落大雨想輪候客人可以盡早入座，咁我地都好理解，但侍應見我地東西比較多，好快又幫我地轉到一個自成一角既座位，真係正！
老苔目：
老苔目粉條係用米漿 "顏" 成，食落確實有米香，可見真材實料，用心製作。湯底食味温和，一d 都唔覺過鹹，與平凡既粉條淡淡然既風格極一致。而面則放左小許肉燥將各食材既香味釣出，但都係點到即止，絲毫無損純樸既風味。老苔目响我心目中就好似台灣人既人情味一樣，唔錯！
老苔目與九嬸既狗仔粥兩者有著近似既地方，均同樣散發所屬地區既純樸；但由於採用食材完全唔同，食味即各顯特性，絶無因此而失望！
肉澡飯 (細碗)：
甜溜溜就係肉澡飯一向比我既感覺。由於侍應極力推介，所以先博一博！Umm.....果然與眾不同，肉燥本身唔太甜兼帶微酸，汁唔 "杰" 又唔濃，與白飯混合，食得舒服，好快就食清光！
滷水拼盆：
原本侍應介紹麻辣牛鍵，但見到好多食客都叫滷水拼盆，而拼盆內又有牛鍵，咪兩者都可以試到。總括黎講滷水味較淡亦無香味，只淺嚐到一點點鹹味同肉燥既酸味，與潮式多層次既滷水比較，可以話乏味，唔知咁係咪台灣滷水汁既特式？至於牛鍵除夠 "淋" 且齋辣外，亦缺麻味及其他味道，有點失望！
牛肉麵：
亦係好多食客既選擇。可取之處在於粗粗既麵條，口感豐富。而牛肉則與牛鍵味道相約，食味太單調，欠缺層次。而濃黑既湯底可見有花心機處理過，與滷水汁同樣帶微酸，但唔係我杯茶，個人較愛台灣牛爸爸既牛肉麵。
地瓜杏仁奶：
一向比較鐘意天然既食材，地瓜與杏仁夠 Gimmick。 攪拌機一陣隆隆聲後，飲品隨即送上。杏仁味好香，但地瓜味就飲唔出。奶中有些粉粉狀，可能係杏仁或地瓜碎，又唔會太膩，ok 喎！
P.S.：侍應知我喜歡辣給我店裡一種黑色既辣油，用筷子頭點兩下，舌頭過10秒後，一陣搶喉既辣就佔據著味蕾，仲辣過用墨西哥 Habanero 辣椒製既辣椒醬，跟著頸項至額頭發熱，呢種辣光係辣，並無其他食味，對我黎講一d 都唔識欣賞。有興趣挑戰既朋友可以一試。
最值得一提係該店職員既服務態度，店舖雖小，但職員待客非常出色，表現友善、温文有禮、主動性強，比得起5星大酒店，真係喜出望外，一定要嘉許！
Post
