廣東人小廚 (Moved) New Location

氣溫由17度一夜之間跌到得番10度，凍到痴哂線，尋日食完百利今晚依然意猶未盡，再同食家到河畔打邊爐。地點是這一帶的唯一選擇廣東人，特別在用的是煤爐，上次吃過都ok所以再來。湯底要了普通的沙爹鍋，$40﹗咁鬼凍在街邊可以對住個煤爐成身暖哂，先來一碟手切新鮮肥牛，$138。價錢唔平，份量卻小得可憐，得十片左右，睇樣亦都唔係話太靚仔，雪花稀疏肥多過瘦，上面有四粒牛粒，$138這個價錢貴得很﹗肥牛夠肥當然夠油香，而牛味亦都幾濃，味道滿意，不過份量太少價錢亦不合理。珊瑚蚌是雪藏貨，食落幾爽脆不過欠鮮甜，食家直頭話唔好食﹗蘿蔔粉絲便宜貨是打邊爐恩物，老闆推介我地食手打墨丸拼魚旦，一碟上枱竟然得六粒丸，手打墨丸竟然得兩粒，個子雖算大不過得兩粒未免有點難睇搵笨，食家決定將墨丸一分為二淥來食﹗魚旦俾佢呃左，邊係手打明明係街市白魚旦﹔墨丸都算彈牙可惜胡椒粉下得過火全無墨魚味，呢個推介真失敗啊﹗要多個西洋菜作結，是晚飲左三支便宜啤酒，埋單成$400，好老實講我們連海鮮也沒吃食呢幾樣野要一人二百蚊是太貴，牛$138得那十片真的過份，食家話沒有辦法這一間是最近屋企之選，這樣我也認同不過下次如有時間的話都應去大圍