胡爐 (Closed)

天氣又轉冷，打邊爐就最啱！去咗銅鑼灣百樂中心嘅胡爐打邊爐！坐位好寛敞，枱與枱之間有可以趟開嘅隔屏，如果多人聚餐，拉開隔板就可以開心gathering！叫咗個花膠雞湯底，金黃色湯底超濃郁，入面有雞件同埋花膠件，足料鮮甜美味。未落火鍋料之前先飲返一碗靚湯～打邊爐牛肉當然必點！胡爐牛拼盤一碟有齊五個部位：牛舌芯、安格斯手切肥牛、極上手切牛頸脊、牛胸爽、霜降牛粒，五種滋味，正！全白色嘅唔係脂肪，係爽脆嘅牛胸爽，軟骨嚟㗎，骨膠原好豐富，我就最鍾意。手打香茜榨菜牛丸有啲似山竹牛肉，混入芫茜味道更清香；黑松露墨魚丸佈滿一點點嘅黑松露，芳香彈牙。餃類我推介手工雲吞，咬開就會見到入面有幾隻蝦肉，大大粒脹卜卜。即炸嘅黄金炸魚皮，鬆厚嘅魚皮上面鋪上一層咸蛋黃，蘸湯食一流。再配埋蔬菜拼盤，暖笠笠嘅晚上。