川味雞烤魚大王 (隆亨商場) (Closed)

今日去大圍探朋友，俾朋友帶咗去＂川味雞烤魚大王‘’嗰度食嘢，我話近期川菜食得多，想食啲清淡啲，佢話川味雞烤魚大王乜都有，想食烤魚、雞煲都唔駛等夜晚，晏晝就有得食。天氣開始乾燥，當然叫返道個滋潤嘅菜式，椰子雞🐓就係必然嘅選擇。椰子雞煲全隻$268一上枱，眼見份量驚人，配料充足，有紅棗、龍眼肉、杏仁、杞子、一片片椰子肉。第一啖湯飲落去非常清甜，我就建議大家不妨飲咗碗湯先再落雞件。雞件分開兩碟而上，斬得完整，而且雞皮嘅皮下脂肪唔多，食落去非常嫩滑！放入煲內索埋湯汁真係相當美味，煲咗雞後嗰碗湯更加清甜，帶濃郁嘅椰香味，配上一碗白米飯🍚個胃暖笠笠，啱晒而家嘅秋冬季節！